Siglir tar il cuntegn

Svizra Brüssel ha cumenzà process cunter terrorist supponì

Sut mesiras da segirtad enormas ha cumenzà a Brüssel il process cunter il sulet attentader che ha survivì las attatgas a Paris il november 2015. Quai rapportan reporters or dal palaz da la giustia a Brüssel.

Purtret da policists armads ch'accumpagnan l'auto.
Legenda: Da policists armads fermamain vegnan ils suspectads transportads en il palaz da giustia a Brüssel. Keystone

Il process che marscha uss cunter il Franzos cun ragischs marocanas pertutga in sajettim cun la polizia, trais dis avant ch'el è vegnì arrestà il mars 2016. Quest process a Brüssel na stat betg en connex cun las attatgas a Paris cun 130 morts.

Il process duai durar fin venderdi. Il derschader ha communitgà che l'attentader na veglia betg vegnì filmà u fotografà durant il process. Tschients policists armads fermamain surveglian il palaz da giustia durant il process.

Chattà tar ina razzia

L'accusà vala sco unic survivent da las attatgas da suicidi dals 13 da november 2015 a Paris. El haja sez purtà ina tschinta cun materia explosiva, n'haja dentant betg laschà explodir quella. Enstagl saja el scappà en Belgia e svanì. Durant mais è el stà l'um il pli tschertgà da l'Europa.

Cura ch'el è vegnì chattà tar ina razzia en in quartier da Brüssel ils 15 da mars 2016, duai el avair blessà ensemen cun cumplizis plirs policists. Trais dis suenter quest sajettim han ins pudì arrestar el ed in cumplizi. Durant quest process vegn tranter auter renfatschà als dus accusads l'assassinat empruvà da policists.

RR novitads 12:00