Siglir tar il cuntegn

Header

cuntegn

Svizra Brissago: Requirent d’asil sajettà da polizia

A Brissago en il Tessin è mort in requirent d’asil (38) da la Sri Lanka durant in'acziun da la polizia. In policist haja sajettà giu l’um ch’era armà cun dus cuntels. Quai communitgescha la Polizia chantunala tessinaisa.

La notg da venderdi sin sonda avant las 02:00 saja la polizia vegnida alarmada pervi dad ina dispita tranter pliras persunas en in’edifizi a Brissago. Tenor la polizia chantunala è plazzada là bundant ina deschina da requirents d'asil. Cun quai che divers requirents d’asil sajan stads involvids haja la patruglia sin il lieu clamà ulteriur sustegn.

Maletg or da l'ajer.
Legenda: Il lieu da cunfin Brissago en il Tessin. Keystone

Malruaus en edifizi cun requirents d'asil maina a mort dad in d'els

En il curs da quell’acziun haja ina patruglia da la polizia chantunala dumandà a duas requirents d’asil d’accumpagnar ella en l'intern da l'edifizi. En là saja stada «ina problematica betg anc definida», cuntinua la polizia sia descripziun da la situaziun.

Cun vegnir en l’edifizi haja andetgamain attatgà in terz requirent d’asil cun dus cuntels ils dus requirents d’asil escortads da la polizia. Per proteger ils presents haja sinaquai in dals policists tratg sin l’attatgader, in um da 38 onns oriund da Sri Lanka, ed al ferì grevamain. Malgrà prim agid immediat saja el mort sin il lieu. Auters na sajan betg vegnids ferids.

Dad emprimas inquisiziuns na resultian ulteriuras mesiras

Uss investighescha la procura publica en chaussa – quai er davart la dumonda da la responsabilitad dal policist che ha sajettà. Or da las emprimas interrogaziuns dal tregant ed autras persunas pertutgadas na saja resultà nagut, ch'avess stuì manar ad ulteriuras mesiras encunter ils pertutgads. Uschia descriva la polizia tessinaisa suentermezdi las emprimas investigaziuns.

La polizia chantunala tessinaisa aveva finì gia sia emprima communicaziun l'avantmezdi cun atschertar, ch’ella stettia a disposiziun plainamain per sclerir quai ch’è succedì. Per garantir neutralitad en las retschertgas da la tecnica criminala èn vegnids clamads spezialists da Turitg.

RR novitads 10:00

Artitgels legids il pli savens