Siglir tar il cuntegn

Header

Navigaziun

Vin cotschen.
Legenda: Svizras e Svizzers han il 2015 bavì 3 milliuns liters damain vin ch’il 2014. La raschun principala è il pli pitschen consum da vin da l’exteriur. Pixabay
cuntegn

Svizra Boom dal dagut cotschen

L’onn passà ha il vin cotschen gì conjunctur’auta. Bunamain 50 milliuns liters da la bavronda d’ivas han ils Svizzers bavì, quai che correspunda ad ina part dal martgà da 28 pertschient. Mender vesa quai or per il vin alv.

Il vin cotschen ha gì in bun onn, mender sa preschenta la bilantscha per il frar alv, communitgescha l’Uffizi federal d'agricultura UFAG.

Vin alv ha pers fans

En tut èsi vegnì bavì radund 99 milliuns liters vins indigens, quai è in plus d’in mez milliun liters. 38 pertschient da tut ils vins consumads èn pia oriunds da la Svizra.

Tras las giargiattas dals Svizzers èn culads 340’000 liters damain vin alv che anc avant in onn; totalmain 49 milliuns liters. La part dal martgà è uschia sa sbassada sin 56 pertschient.

Damain vin cotschen da l’exteriur

Gia dapi onns sa reducescha il consum da vin en Svizra. Be il 2013 aveva quai unicamain dà in augment. Cunzunt vins cotschens da l’exteriur n’èn betg pli uschè populars, il consum è sa reducì per bunamain 4 milliuns liters sin 126 milliuns liters. Però è il consum da vins alvs da l’exteriur creschì in zic sin 39 milliuns liters.

Cunter il trend èn vegnids bavids dapli vins stgimants – il 2015 totalmain 18 milliuns liters.

RR novitads 16:00

Sitga stad

Tenor l’UFAG hai il 2015 dà ina pli pitschna racolta (85 miu. l) pervi da la stad chauda e sitga. Uschia è vegnì vinifitgà damain vin che consumà, ils deposits da vins svizzers èn sa sminuids.

La surfatscha da vignas en Svizra è restada circa tuttina (14’800 ha). Las pli bleras ivas cotschnas creschan en il Vallais, las pli bleras alvas en il Vad.