Siglir tar il cuntegn
cuntegn

Svizra Booking.com e co. vegnan sut squitsch

Plattafurmas da reservaziun online dattan avant als hotels ils pretschs minimals per las chombras, quai vul il parlament ussa scumandar. Il Cussegl naziunal ed il Cussegl dals chantuns han incumbensà il Cussegl federal da scriver quest scumond en la lescha.

Pagina da Booking.com.
Legenda: Il parlament sustegna la hotellaria svizra. Keystone

La maioritad ha argumentà che questas prescripziuns da pretschs entras paginas d’internet sco Booking.com donnegian la concurrenza. Il Cussegl federal e la minoritad perencunter èn da l’avis ch’i po vegnir cumpareglià ils hotels grazia a las plattafurmas e quai promovia la concurrenza.

Plattafurmas daventan adina pli impurtantas

Che plattafurmas online daventan adina pli impurtantas, mussa er ina retschertga da l'institut per il turissem da la scol'auta en il Vallais. Il 2016 è la cumpart da las reservaziuns en Svizra sin talas furmas creschì per 6,7% sin radund 27%. Tenor la retschertga domineschan las trais plattafurmas Booking, Expedia e HRS la fatschenta.

Booking.com deplorescha - ils hoteliers èn cuntents

En ina communicaziun deplorescha Booking.com la decisiun. Il parlament frainia uschia la concurrenza e la transparenza. Als consuments smanatschian pretschs pli auts.

Gist il cuntrari vesan quai ils hoteliers. La decisiun stgaffeschia dapli libertad d'interpresa per ils hotels. En auters pajais valian gia tals scumonds, scriva l'uniun da turissem, las pendicularas svizras, Gastrosuisse e hotelleriesuisse.

RR novitads 20:00