Siglir tar il cuntegn
cuntegn

Svizra Bombardier stritga en Svizra plazzas a l’engronda

Il concern canadais Bombardier vul stritgar 650 plazzas en Svizra. Il constructur da trens ed aviuns conferma la communicaziun correspundenta dal sindicat Unia envers l’agentura da novitads svizra SDA.

In tram en construcziun.
Legenda: In tram «Cobra» per la citad da Turitg en il lieu da producziun da Bombardier a Villeneuve (VD). Keystone

Tenor ina communicaziun dal sindicat Unia giajan a perder las 650 plazzas, tranter quellas 500 plazzas limitadas sin temp, en emprima lingia a Villeneuve (VD), ma er a Turitg. L’Unia scriva da vulair s’engaschar ensemen cun il persunal ed ils represchentants da quel activamain per che tantas plazzas da lavur sco pussaivel possian vegnir mantegnidas.

En la procedura da consultaziun, che cumenza in venderdi, spetgia il sindicat in «dialog constructiv», cun quai che l’interpresa profitia fermamain dad incumbensas publicas. Uschia haja Bombardier suttascrit gist in contract grond cun in’interpresa da transport svizra.

Il concern canadais restructurescha actualmain ses sectur da transport en tut il mund. Gia l’onn passà aveva el annunzià da reducir las plazzas en Svizra. Tenor l’Unia haja Bombardier il mument 1’300 collavuraturas e collavuraturs en Svizra.

RR novitads 17:00