La finamira da las investigaziuns novas saja da sclerir tgi ch'haja dà vinavant las infurmaziuns confidenzialas sur dal project Bodluv a las medias. In pledader da la giustia militara, Mario Camelin, ha confermà in rapport da la gasetta «Le Liberté» a l'agentura da novitads SDA. Indicaziuns concretas sur dal cas n'ha el dentant betg fatg.
L'emissiun «Rundschau» da SRF e la gasetta «Zentralschweiz am Sonntag» avevan publitgà il mars 2016 documents confidenzials dal project. Sinaquai aveva il minister da defensiun, Guy Parmelin, sistì ils 22 da mars il project. L'argument era ch'il concept stoppia vegnir surlavurà. Curt suenter aveva la giustia militara avert ina procedura cunter nunenconuschent. La fin da l'onn 2016 era la procedura vegnida sistida cunquai che nagin era vegnì eruì sco responsabel d'avair surdà infurmaziuns.
RR novitads 16:00