Per il terz quartal da quest onn sa la Banca naziunala svizra preschentar in gudogn da 32,5 milliardas francs. Ensemen cun il gudogn dad 1,2 milliardas francs en l'emprim mez onn, munta quai ad in surpli da 33,7 milliardas francs per ils emprims nov mais da l'onn.
In tal gudogn era vegnì spetgà. Raschun per il resultat extraordinari èn la sminuziun da la valur dal franc svizzer, il pretsch pli aut per aur e l'atmosfera positiva sin ils martgads d'aczias. Il retgav da la Banca naziunala svizra dependa per gronda part dals martgads dad aur, da devisas e da chapital. Ferma instabilitad saja per quai la regla e da far uss prognosas per il retgav da la fin da l'onn saja mo limità pussibel, scriva la Banca naziunala.
Il segund quartal aveva la banca anc scrit ina perdita da 6,7 milliardas francs. Sco motiv principal aveva la Banca naziunala numnà deficits sin valutas estras.
RR novitads 09:00
