Siglir tar il cuntegn
cuntegn

Svizra BLS Cargo fa svieuta da record

L'interpresa da traffic da martganzia BLS Cargo ha l'onn 2017 fatg ina svieuta da pli che 200 milliuns francs. Quai è in nov record.

BLS Cargo.
Legenda: Il 2017 è cun ina svieuta da 203 milliuns stà in onn da record per BLS Cargo. Keystone

Malgrà ch'il traject tranter da Val dal Rain a Raststatt en Germania è restà serrà per bunamain dus mais, ha l'interpresa da traffic da martganzia BLS Cargo fatg ina svieuta da record il 2017: 203 milliuns francs. Quai èn 6% dapli che l'onn avant.

Il gudogn munta uschia a 3,5 milliuns francs – dus milliuns dapli che l'onn avant. Senza la panna da Raststatt fiss quel tenor BLS Cargo stà per dus milliuns pli aut. Questa summa pretendian ins uss sco indemnisaziun tras ils responsabels.

Panna da Raststatt

La lingia da Val dal Rain a Raststatt è stada interruta perquai ch'ils binaris eran sa sbassads sin in nov tunnel. Responsabel per la panna sajan u la firma da construcziun u la rait da la viafier tudestga. «Ins na sa betg discurrer dad ina pussanza pli auta. Insatgi sto surpigliar responsabladad», manegia il CEO da la BLS Cargo Dirk Stahl.

Perquai avevan ins stuì sviar radund 450 trens.

Sviament

Durant ch’il tschancun da la Val dal Rain è stà serrà – ha passa la mesadad dals trens stuì vegnir sviada sur Singen en Germania e sur la Frantscha.

RR novitads 12:00