Curt e concis:
- L’anteriur cusseglier federal Christoph Blocher banduna la cumissiun da direcziun da la PPS.
- Sia figlia Magdalena Martullo-Blocher duai remplazzar el.
- Quest gremi è responsabel per la finanziaziun e la realisaziun da las campagnas.
Blocher duai vegnir remplazzà da sia figlia Magdalena Martullo Blocher. La cussegliera naziunala che represchenta il Grischun a Berna vegn era proponida sco nova vicepresidenta da la partida.
Era l'anteriur cusseglier guvernativ vallesan Oskar Freysinger e l'anteriur cusseglier naziunal Walter Frey sa retiran ord la direcziun da la partida. Dasper Martullo vegn proponi era Marco Chiesa cusseglier naziunal dal Tessin, Sandra Sollberger cussegliera naziunala Basilea-Champagna, Adrian Amstutz cusseglier naziunal Berna, sco era cusseglier naziunal Marcel Dettling dal chantun Sviz. Il cusseglier naziunal Thomas Matter da Turitg resta en quest gremi.
Radunanza da delegads a Claustra
Ils delegads da la PPS vegnan a s'inscuntrar ils 24 da mars a Claustra, communitgescha la PPS. Alura vegnan els ad eleger ils gremis da la partida. Per ina ulteriura perioda d'uffizi da dus onns stat il president Albert Rösti a disposiziun sco era la vicepresidenta Céline Amaudruz da Genevra. Era part da la direcziun da la partida fa il schef da fracziun da la PPS Thomas Aeschi.
RR novitads 15:00