A Basilea han demonstrà dapli che 5'000 persunas cunter rassissem e violenza da polizia. Quai cun il slogan «Black Lives Matter». La demonstraziun n'è betg stada lubida. La polizia ha mussà preschientscha senza intervegnir. Ella ha repartì figls sgulants cun las dirctivas da cumportament dal Cussegl federal, rapporta l'agentura da novitads Keystone-SDA.
L'atmosfera saja stada paschaivla. Ils demonstrants hajan purtà tavlas cun scrit si «Black Lives Matter» u «White silence = violence». Pledaders e pledadras han rapportà da lur atgnas experientschas rassisticas en Svizra.
Polizia da Turitg ha arrestà organisatura
A Turitg èn passa 1'000 persunas sa participadas a la demonstraziun. La polizia ha accumpagnà quella enfin ch'ella saja puspè sa schliada. La manifestaziun han els tolerà. La polizia ha dentant arrestà la dunna che duai avair organisà la demonstraziun illegala. Ina segunda persuna saja vegnida arrestada pervi da violenza e smanatschas envers uffiziants.
Bain pon manifestaziuns politicas e da dretg civil puspè avair lieu dapi oz, dentant be fin tar in dumber da 300 persunas. Plinavant ston ils organisaturs elavurar in concept da protecziun e numnar ina persuna responsabla.
Acziun simbolica a Berna
A Berna han protestà intgins tozzels da persunas a moda simbolica encunter il rassissem. Els èn sesids nà en in mez rudè a la plazza da la staziun ed han purtà mascras da protecziun cun scrit si «I can't breathe», quai che munta «jau na poss betg trais flà» – ils pleds che George Floyd ha clamà.
Neuschatel cun concept da protecziun
En la Svizra franzosa, a Neuschatel hai dà ina manifestaziun lubida cun 500 persunas, repartidas en duas gruppas. Uschia hajan ins pudì resguardar la limita da 300 persunas da las autoritads. Tenor la polizia saja la demonstraziun stada paschaivla. Ils demonstrants hajan tuts purtà mascras da protecziun.
Malgrà scumonds e restricziuns pervi da la pandemia da corona èsi vegnì demonstrà ils ultims dis en diversas citads europeicas. La raschun è il mazzament da l'Afroamerican George Floyd en ils Stadis Undis, tar in'acziun da polizia. Cun «Black Lives Matter» vegn fatg attent a la brutalitad da polizia ch'è en ils Stadis Unids surproporziunalmain drizzada envers persunas da pel stgira.
