En il cas «betg fitg probabel» che la furniziun d'energia sa meglierescha, creschia il BIP per 2% il 2023. La politica monetara stuess era per quai vegnir schluccada. Plinavant sto il consum sa revegnir vinavant da la pandemia da corona. L'economia possia forsa s'adattar meglier che spetgà a la stgarsezza d'energia.
Sche quei è betg il cas quinta il SECO cun in augment dal BIP da 0.8%. Quai è la prognosa uffiziala per 2023 dal Secretariat d'economia da la Confederaziun. Avant trais mais ha el anc quintà cun 1.6%. Per 2022 quinta el cun 2,1, enstagl 2,8%.
Gronda intschertezza en il mument
Per las prognosas presuma il SECO ch'i na vegnia betg a dar largias en la furniziun d'electricitad en l'Europa. Sche quai schabegiass, sa reduceschia il BIP per 0,8%. La chareschia possia lura crescher per 4%. Almain na saja la Svizra betg uschè dependenta d'energia sco l'exteriur per laschar crescher il BIP. Mo mez uschè fitg sco auters pajais en la media, precisa il SECO.
Quota da dischoccupaziun crescha
Per il davos quartal da 2022 quinta il SECO cun dapli dischoccupaziun (augment da 0,1%). Er la chareschia saja il 2022 tar 3%, e betg tar 2,5% sco preditg avant trais mais. Tut en tut valitescha il SECO il martgà da lavur però anc adina sco «fitg solid».
