Ina delegaziun dal Cussegl federal, manada dal president Alain Berset vul beneventar il papa e s'entupar per in discurs uffizial. Quai ha communitgà la chanzlia federala mesemna. Ulteriuras modalitads da la visita dal papa vegnian anc scleridas, ha ditg la chanzlia federala a l'agentura da novitads svizra.
Medias talianas avevan rapportà d'ina visita l'avrigl u il matg al cussegl ecumenic a Genevra. Il cussegl ecumenic mundial, era numnà cussegl ecumenic da la baselgia aveva envidà il papa.
Cussegl ecumenic
Avrir la boxSerrar la box
Tar il cussegl ecumenic da la baselgia tutgan radund 350 communitads da baselgias: baselgias protestantas, anglicanas, ortodoxas e vegl catolicas da passa 110 differents pajais. L'uniun internaziunala cun sedia a Genevra è vegnida fundada il 1948 ad Amsterdam. La baselgia catolica na fa betg part dal cussegl ecumenic. En cumissiuns impurtantas lavuran dentant theologs catolics cun sco commembers cumplains.
Ultima visita d'in papa il 2004
L'ultim papa ch'ha visità la Svizra è stà papa Gion Paul II ch'è vegnì a Berna. Sia ultima visita il 2004 è stada la quarta. Be tschintg auters pajais ha il papa visità pli savens che la Svizra.