L'ovra atomara da Beznau ha inoltrà a l'inspectorat federal per segirtad nucleara ENSI la cumprova da segirtad per il bloc 1. Las examinaziuns ed analisas hajan mussà che las irregularitads constatadas la stad 2015 n'hajan betg in'influenza relevanta sin la qualitad dal material ed uschia per la segirtad dal recipient da pressiun dal reactur. L'ovra possia vegnir manada enavant enfin il 2030.
Vid ina copia dal rintg che tutga tar il recipient da pressiun dal reactur han las retschertgas per la cumprova d'integritad pudì vegnir fatgas. Quest "Safety Case" è vegnì inoltrà a l'ENSI ils 14 da november. El mussia ils resultats da las retschertgas vid il rintg. Qestas retschertgas eran:
- analisa tar la derivonza e tar la furmaziun da las particlas inclusas en il material
- examinaziun da l'influenza da questas particlas sin la funcziun dal material dal rintg
- examinaziuns tar la fermezza e cumprovas tar la resistenza da l'atschal
- analisas termo-idraulicas
- novas examinaziuns tar las provas gia fatgas
- calculaziun da las reservas da segirtad per il diever futur.
Cun quest "Safety-Case" saja cumprovà che la segirtad da l'ovra electrica saja garantida. L'ENSI vegnia ad examinar la cumprova d'integritad e lura decider davart la permissiun da cuntinuar il diever da l'ovra atomara.
RR novitads 12:00
