Siglir tar il cuntegn

Header

Navigaziun

Ina fuolla da persunas.
Legenda: La realisaziun da l’iniziativa cunter l’immigraziun da massa vegn influenzada fermamain da dumondas economicas. Keystone
cuntegn

Svizra Betg perina co realisar iniziativa cunter immigraziun da massa

Co duai l'iniziativa cunter l'immigraziun da massa vegnir realisada? Il Cussegl federal ha discutà en sia sesida emnila in'emprima proposta. Per Heinz Brand da la PPS èsi cler ch'i na va betg senza contingents.

Co duai l'iniziativa cunter l'immigraziun da massa vegnir realisada? Dapi il stretg gea da la populaziun svizra ils 9 da favrer 2014 fatschenta quella dumonda la politica naziunala. Cunzunt era il Cussegl federal. En sia sesida emnila ha el discutà in'emprima proposta. Detagls vegn el a preschentar en il decurs dal proxim temp.

La PPS stat tar contingents

Gia fatg in maini han las partidas. Per Heinz Brand da la PPS èsi cler ch'i na va betg senza contingents. Dasperas stuessi era dar levgiaments per persunas che vegnan be per curt temp en Svizra. Ed ils chantuns al cunfin duain survegnir dapli cumpetenzas per reglar il traffic dals cunfinaris. Illusoric saja dentant da crair ch'ins possia respunder questa dumonda senza definir ina limita fixa.

Sumegliant vesa quai era il president da la PLD, Phillip Müller. Las valurs directivas sajan scrittas en la Constituziun federala. Il Cussegl federal na possia betg s'allontanar da quellas.

Ch'il Cussegl federal presentia ina proposta strict tenor il text da l'iniziativa spera era Hans Grunder da la Partida burgais-democratica (PBD). Ses motiv è dentant in tut auter. Baud u tard vegni a dar ina votaziun, e cun ina schliaziun stricta poss’ins mussar a la populaziun, ch'in gea signifitgass la fin dals contracts bilaterals.

Contingents main relevants per la PS

Per ils socialdemocrats n'è la dumonda da contingents betg uschè relevanta. Pli impurtant è tenor Andy Tschümperlin ch'il Cussegl federal prevesia era mesiras, per reducir la dependenza da l'economia svizra da persunal da l'exteriur.

La cristiandemocrata Kathy Riklin pretenda ch'il Cussegl federal applitgeschia a moda stricta las leschas existentas, e ch'el n'introduceschia nagins contingents cunter persunas ord l'UE. Tar persunas d'auters pajais stoppia el dentant reducir marcantamain l'immigraziun. Quai ed in program per promover il martgà da lavur indigen augmentian las schanzas, ch'ils contracts bilaterals cun l'UE sappian vegnir salvads, è Riklin persvadida.

Tuts vegnan betg ad esser cuntents

Anc n'ha il Cussegl federal betg preschentà sia proposta. D'ademplir tut ils giavischs da las partidas na vegn dentant strusch ad esser pussaivel.

RR actualitad 11:00