Siglir tar il cuntegn
cuntegn

Svizra Betg mo bunas regurdientschas dals paralimpics a Pyeongchang

Cun 3 medaglias ha la delegaziun svizra cuntanschì la finamira. La scheffa da la delegaziun Luana Bergamin è perquai cuntenta. Ma a Pyoengchang avessan in pèr chaussas pudì esser meglras, uschia per exempel l'infrastructura ed ils transports per persunas cun impediments.

Théo Gmür vid festivar ina da sias victorias.
Legenda: Théo Gmür ha gudagnà 3 medaglias d'aur als gieus paralimpics a Pyeongchang. mad

Dal punct da vista sportiv ha la delegaziun svizra cun ses 13 atlets ed atletas cuntanschì la finamira da trais medaglias. Quellas èn tuttas trai idas al skiunz Théo Gmür. Autras sportistas ed auters sportists hajan dentant betg cuntanschì, quai ch'ins aveva spetgà.

Per la manadra da la delegaziun svizra Luana Bergamin è l'organisaziun dals gieus paralimpics a Pyeongchang betg stada ideala. La glieud haja dà gronda bregia da sa gidar, ma l'infrastructura ed ils bus da transport sajan per exempel betg stads adattads per persunas cun sutgas da rodas.

Cun jetlag e senza valischs

Turnada è la delegaziun svizra la notg da mardi sin mesemna. Quai cun pulit retard, cun in jetlag e senza valischs. Tuttina hajan las atletas ed ils atlets giudì da vegnir beneventads da blers enconuschents e las famiglias a la plazza aviatica da Turitg.

purtret Luana Bergamin
Legenda: La delegaziun svizra è vegnida manada da Luana Bergamin. mad

RR actualitad 08:00