Siglir tar il cuntegn
cuntegn

Svizra Berna: Tgi che dumonda asil na duai betg viagiar

Il Cussegl naziunal pretenda in scumond da viadi general per persunas che han survegnì temporarmain asil en Svizra. Da vista dal Cussegl federal na saja in tal scumond betg commensurà, scriva l’agentura da novitads svizra SDA.

La chasa federala cun bandiera svizra.
Legenda: Il Cussegl naziunal vul in scumond da viadi general per persunas che han survegnì asil intermediar en Svizra. Keystone

Cun quest scumond vul il Cussegl naziunal impedir pli effizientamain che actualmain, che persunas che han survegnì asil temporar possian far viadis en lur patria. La gievgia ha la chombra gronda perquai acceptà propostas da la fracziun da PLD e PPS e dal president dal PCD.

Sommaruga appellescha da restar commensurà

La ministra da giustia Simonetta Sommaruga ha argumentà senza success, che fugitivs e persunas che han survegnì asil temporar na dastgan gia uss betg viagiar en lur patria. In tal scumond general excludia er viadis en ils pajais vischins da la Svizra, ha ditg Sommaruga.

Uschia vegnian tutgadas fitg bleras persunas, ch’ils parlamentaris n’avessan gnanca en mira cun lur restricziun, citescha la SDA la ministra da giustia Sommaruga.

RR novitads 14:00