Siglir tar il cuntegn

Header

Parlamentaris ed aspectaturs dal Cussegl naziunal durant la sessiun.
Legenda: La sessiun d'atun ha cumenzà. Qua in maletg da la sessiun d'atun 2015. Keystone
cuntegn

Svizra Berna: Immigraziun, prevenziun per la vegliadetgna e daners

A Berna ha cumenzà gindesdi la sessiun d’atun dal Parlament federal. En il center da las debattas stattan pliras fatschentas grondas che duain vegnir terminadas u almain in pass decisiv vinavant. Per grondas discussiuns vegn a procurar la realisaziun da l’iniziativa cunter l’immigraziun da massa.

Il Cussegl federal vuleva realisar l’iniziativa da la PPS cun introducir ina clausula da protecziun unilaterala. En la cumissiun dal Cussegl naziunal n’ha quella proposta dentant betg chattà avunda sustegn. La chombra gronda vegn perquai a debattar davart ina sort 'favurisaziun d’indigens light'. Per la PPS betg acceptabel. Ella pretenda che la Svizra regleschia sezza l’immigraziun, quai cun contingents. Sche quai na chatta nagina maioritad vul la partida tut tenor prender il referendum cunter la schliaziun dal parlament, ni perfin lantschar ina nova iniziativa.

Per e cunter augmentar las rentas d'AVS

Tar la prevenziun per la vegliadetgna na vul la cumissiun dal Cussegl naziunal savair nagut da l'augment da las rentas d’AVS per 70 francs. In tal augment aveva la chombra pitschna decidì per cumpensar la reducziun da la tariffa da conversiun da la secunda pitga da 6,8 sin 6 %.

Plinavant duai dar ina sort d’automatissem. Sch’il fondo da l’AVS croda sut 80% da la summa da las expensas annualas, duai la vegliadetgna da pensiun vegnir augmentada successivamain sin 67 onns.

En la fasa finala

En la fasa finala è la strategia d’energia 2050. Differenzas tranter Cussegl naziunal e Cussegl dals chantuns datti anc tar la dumonda sch’ils interess da la protecziun da la natira ed ils interess da la promoziun d’energias regenerablas duain vegnir tractadas egual.

Ulteriuras fatschentas

Autras fatschentas che vegnan a procurar per discussiuns èn il rapport davart il Service Public, il fondo per las vias naziunalas ed il traffic en las aglomeraziuns ed in scumond naziunal da zuppentar la fatscha.

RR actualitad 12:00

La sessiun d'atun 2016

Quai èn las fatschentas centralas:

  • l'iniziativa cunter l'immigraziun da massa
  • la refurma da la prevenziun per la vegliadetgna 2020 (AVS e cassa da pensiun)
  • la strategia d'energia 2050
  • budget per ils purs (2018 - 2021)
  • budget per furmaziun, perscrutaziun ed innovaziun e per l'infrastructura da viafier (2017 - 2020)
  • rapport davart il Service Public