Siglir tar il cuntegn
Inhalt

Svizra Berna: Cumissiun vul pussibilitar «open content»

La cumissiun per traffic e telecommunicaziun KVF pretenda, che medias privatas possian er duvrar producziuns atgnas da la SRG/SSR – quai en il senn da «open content».

Blers visurs in sper l'auter.
Legenda: La SRG/SSR en sia funcziun sco host broadcaster als Campiunadis mundials a San Murezzan. Keystone

Cun 13 cunter 10 vuschs tar 2 abstenziuns ha ella decis ina moziun en chaussa. Quai scriva l’agentura da novitads svizra sda. Uschia veglia la cumissiun flaivlentar la posiziun predominanta da la SRG areguard videos da novitads cun cuntegn naziunal e surregiunal, scriva la sda vinavant.

Plinavant pretenda la cumissiun da sistir emetturs da radio senza ina funcziun da service public e numna tant Radio Swiss Pop, Radio Swiss Classic, Radio Swiss Jazz sco er Radio SRF Virus, Radio SRF Musikwelle u Radio RTS Option Musique.

Er vul ella abolir la regla ch’in emettur dastga mo cumprar mintgamai duas concessiuns da televisiun e radio. Il parlament debattescha la primavaira davart questas moziuns.

RR novitads 20:00