Igl è la baselgia che sa chatta sur il center da congress a Tavau. Las paraids da la baselgia èn tapezadas cun reclama per la firma da finanzas Filcoin e l’emettur da televisiun american CNBC. Omadus èn sa chasads en la baselgia per ils dis dal WEF. Per il reverenda Marc Schmed è quai dentant in zic curius da vesair la baselgia da dadens che ha tut in autra parita.
Là nua che la cuminanza sesa normalmain è uss in audienza. Ils bancs da baselgia n'èn betg pli da vesair. Sur ils bancs è vegnì fabritgà in fund da lain. Quel vul Marc Schmed mantegnair per l’avegnir. Uschia possian ins duvrar la baselgia pli flexibel. E nua che Marc Schmed tegna normalmain ses predi è in podium nua che vegn discutà. Installada è era tecnica per registrar las discussiuns.
Nagin servetsch divin
In servetsch divin è crudà ora pervi da la baselgia affittada. Quai saja bain in pau problematic per l’image da Tavau. Dentant èsi tenor Marc Schmed in dar e prender. Ins discuteschia era adina puspè cun la cuminanza sche quai è in urden da fittar la baselgia. Ch'i possia esser dispitaivel da dar a fit la baselgia ad ina firma da finanzas è conscient a Marc Schmed. Dentant la firma s’engaschia per in mund pli verd sin il martgà da finanzas e quai haja persvadì. Ins avess era pudì affittar per in budget ch'è 10 giadas pli aut la baselgia. Dentant na giaja quai betg per daners, di Marc Schmed. Per quant che las localitads e la baselgia vegn fittada na tradescha il reverenda dentant betg - ils daners giajan per il mantegniment da la baselgia e per occurrenzas.
Tavau today – Fabia Caduff e Sabrina Bundi raquintan, tge che è capità oz al WEF.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.