Siglir tar il cuntegn
Inhalt

Svizra Barat da students - Berna vul cuntinuar

Il Cussegl naziunal va d’accord cun la schliaziun provisorica per il barat da students. Per ils proxims trais onns ha el lubì 114,5 milliuns francs. Emprovas da stritgar parts èn stadas vanas.

Plirs buls che pendan
Legenda: Ils davos dus onns hai dà mintgamai enturn 10'000 barats da students. Keystone

La gronda part dal credit duai promover durant ils onns 2018 fin 2020 barats da students cun l’exteriur. Perquai èn previs 93,9 milliuns francs. 11,1 milliuns francs èn per l’agentura Movetia ch’organisescha il barat. Var 10 milliuns dovri per mesiras accumpagnantas.

Refusà scursaniziuns

Cussegliers da la dretga han adumbatten battì per scursanir il credit. Desister vulevan els sin la promoziun da la cooperaziun internaziunala tranter instituziuns da furmaziun svizras ed estras. Plinavant ha la PPS ed ina part da la fracziun da la PLD pretendì, da stritgar il credit per l’agentura Movetia. La cumpart che pertutgia la scola primara tutgia als chantuns da finanziar.

Erasmus manca

La Svizra procura sezza per il barat da students cun l'exteriur, damai ch'ella na fa betg part dal program da barat da l'UE «Erasmus+». Las tractativas per che la Svizra possia sa participar al program aveva l'UE sistì, suenter il «gea» a l'iniziativa davart l'immigraziun da massa il 2014.

RR actualitad 07:00