Siglir tar il cuntegn

Svizra Bancnotas na duain betg pli scader

Il Cussegl federal propona da desister sin la limita da barattar bancnotas veglias.

Bancnotas da la seria dal 1976.
Legenda: Na duain betg pli perder lur valita – La seria da bancnotas dal 1976. Keystone

Sch'ina nova seria da bancnotas cumpara cloma la Banca naziunala svizra enavos las veglias. Durant 20 onns pon ins lura anc barattar quellas, silsuenter perdan ellas lur valita ed èn mo pli d'interess per ils numismats. Il Cussegl federal propona ussa al parlament da renunziar sin quella pratica.

Davent da la seria da bancnotas ch'è cumparida il 1976, la davosa seria cun ina bancnota da 500 francs e nua che la bancnota da 1000 francs mussava pliras furmiclas, davent da quella seria na duain las bancnotas betg pli perder lur valita.

Tenor la regenza è la mobilitad da las Svizras e dals Svizzers creschida e la populaziun vegnia era pli veglia. Cun la midada possian ins uschia impedir ch'ina persuna posseda tuttenina bancnotas senza valita. Plinavant hajan era autras naziuns industrialas abolì il temp da barat da bancnotas.