Siglir tar il cuntegn
cuntegn

Svizra Bancas svizras mitschadas cun in egl blau

La fin dal secret bancar per clients da l’exteriur n’ha fatg nagin donn a la plazza da finanzas svizra. Quai ha communitgà Jacques de Watteville, il secretari da stadi per dumondas finanzialas internaziunalas (SIF).

Jacques de Watteville
Legenda: Jacques de Watteville, il secretari da stadi per dumondas finanzialas internaziunalas. Keystone

Jacques de Watteville vaiva surtut sia incarica l’onn 2013, l’onn che las bancas svizras temevan tants plants da l’USA. Ed era las relaziuns cun l’UE ed ils pajais cunfinants eran tendidas.

En il fratemp è sa normalisada la situaziun

Las bancas Svizras èn vegnidas davent cun be in egl blau. La Svizra ha decretà dapi la crisa da finanzas bleras regulaziuns ed ha surtut standards internaziunals. La plazza da finanzas Svizra n’ha però betg patì da questas mesiras, di Jacques de Watteville. Anzi, la plazza da finanzas svizra saja vegnida rinforzada. La Svizra è per exempel anc adina il leader tar la gestiun da valurs da facultad privatas.

Sfidas per l’avegnir

Ina finamira centrala da la Svizra en l'avegnir è l’access al martgà per interpresas da servetschs da finanzas. Cun la Germania è vegnida chattada ina soluziun la stad passada. Ma il dialog n’è betg simpel, di de Watteville. Cun l’UE vevan cumenzà discurs explorativs per realisar ina cunvegna per in tal access al martgà. Ma quests discurs èn vegnids sistids e suspendids, perquai che l’UE vul sco emprim avair sin maisa soluziuns davart la realisaziun da l’iniziativa d’immigraziun da massa.