La banca gronda UBS ha en vista al sustegn finanzial per interpresas svizras surdà 23’000 credits en la valita da 1,8 milliardas francs. Tenor il schef dal concern, Sergio Ermotti, muntan ils credits en media a 200’000 francs.
Pitschnas summas fin credits da milliardas
La gronda part sajan credits sut in mez milliun, i dettia dentant er credits enfin 20 milliuns. Ordaifer dal program da sustegn per interpresas svizras dettia dentant er dumondas da concerns multinaziunals che surpassan questa cifra. Tenor Ermotti dettia tut; davent da fitg pitschnas summas enfin credits da milliardas.
Nagin gudogn cun credits
El speria, che interpresas pitschnas e da grondezza mesauna pon vegnir salvadas cun agid da las bancas. La finamira da l'acziun saja, che las fatschentas possian surmuntar la crisa. Las firmas stoppian far debits, ils credits sajan dentant senza tschains. Ermotti ha punctuà che la UBS na fa nagin gudogn cun ils credits. E sch'i vegnia tuttina a dar gudogns, vegn la UBS a donar ils daners.
