Siglir tar il cuntegn
cuntegn

Svizra Banca naziunala duai pajar 1,2 milliardas a las cassas da pensiun

L’Uniun sindicala svizra USS fa quitads per l’economia svizra. Ils motivs èn la dischoccupaziun creschenta e la capacitad da cumpra che diminuescha pervi da las contribuziuns per las assicuranzas socialas.

L'Uniun sindicala svizra USS.
Legenda: L'Uniun sindicala ha clamà a l'inscunter da medias annual e fatg attent sin la dischoccupaziun. Keystone

Il product naziunal brut per persuna stagnescha quasi en Svizra, scriva l’Uniun sindicala. E la Svizra saja in dals paucs pajais en l’Europa nua che la dischoccupaziun creschia dapi il 2015. Perquai vul l’USS uss cun ina retscha da mesiras preschentadas far frunt a quest svilup.

Rembursar tschains negativs

Uschia duai la Banca naziunala svizra (BNS) pajar ora a las cassas da pensiun las bun 1,2 milliardas francs ch'ella incassa cun ils tschains negativs ch'ella impona sin daners da bancas ed instituts da finanzas. La BNS aveva introducì ils tschains negativs per render main attractiv il franc svizzer per investurs.

Ina premia da cassa da malsauns dependenta da las entradas

Ultra da quai pretenda la USS che nagin duai pajar dapli che 10% da ses gudogn net per las premias da la cassa da malsauns. Sco finamira numna la USS ina summa da fin a 8%. Ma la finamira a lunga vista saja ina premia dependenta da las entradas. Era duai la summa da 300 milliuns francs che la cumissiun da concurrenza (CUMCO) incassescha per surpassaments vegnir impundida per reducir las premias da cassas da malsauns, scriva la USS.

RR actualitad 12:00