Il BAFU mesiria dapli datas da l'ambient che quai che fiss necessari. L'uffizi mesiria 530 indicaturs ed haja dà ora l'onn passà radund 21 milliuns francs. En auters pajais vegnia mesirà e pretendì sulettamain 170 indicaturs. Quai ha constatà la controlla da finanzas. Be mintga tschintgavel indicatur saja prescrit da la lescha. En pli na portia ina part da las mesiraziuns betg ina gronda plivalur. Quai saja cunzunt il cas en ils secturs da clima, rument, canera u biotecnologia.
Controlla da finanzas dat tips
Perquai propona la controlla da finanzas a l'uffizi d'ambient da stritgar indicaturs nunnecessaris. En in proxim pass fissi necessari d'examinar, co ins pudess optimar ils process. Sco exempel numna la controlla da finanzas dronas che pudessan mesirar l'effectiv dals guauds.
Uffizi d'ambient reagescha
Markus Wüest dal BAFU è fitg d'accord ch'i dovria pli paucs indicaturs. Tenor el fissan 250 fin 300 indicaturs la schliaziun ideala – pia radund la mesadad dad ozendi. I na vegnia perquai dentant betg massivamain pli bunmartgà. Tar bleras mesiraziuns vegnian gist plirs indicaturs eruids, ha argumentà Wüest. Er sch'il dumber d'indicaturs vegnia reducì, sajan las bleras mesiraziuns anc vinavant necessarias.
RR novitads 07:00