Siglir tar il cuntegn

Header

cuntegn

Svizra Axpo vul 4,1 milliardas da la Confederaziun

Sch'il suveran svizzer avess da dir ils 27 da november gea a l'iniziativa per sortir da l'energia atomara, vul il concern d'energia in'indemnisaziun per las entradas che mancassan lura.

Quai di il schef da l'Axpo Andrew Walo en la NZZ am Sonntag. Tut las expertisas giuridicas hajan demussà ch'i dettia ina basa legala per pretender indemnisaziuns da la confederaziun.Sco argumentaziun di Walo tranter auter:

Nus avain investì per 60 onns. Sche las ovras atomaras vegnan serradas per motivs politics gia suenter 45 onns, lura mancan a nus las entradas.
Autur: Andrew Walo Schef da l'Axpo

Il Cussegl federal quinta gia cun pretensiuns per indemnisaziuns. Dentant vulan els pajar bler pli pauc. Numnadamain cun cifras da milliuns da trais cifras per mintga ovra nucleara. L'Axpo maina duas ovras, quella da Beznau e Leibstadt. Perquai ch'ils pretschs per l'electricitad sajan uschè bass e las ovras atomaras fetschian il mument sperdita, èn ils iniziants da l'avis ch'indemnisaziuns da fetschian nagin basegn.

Pli paucas entradas

Sin las 4,1 milliardas ven l'Axpo para pervi da la curva da pretschs che l'uffizi federal per energia haja quintà or. Là van els da quai annora ch'ils pretschs creschain puspè. Tras tschentar giu pli baud las ovras perdia l'Axpo uschia entradas. Plinavant procuria il tschentar giu las ovras era per dapli custs e las entradas dals tschain manchian era.

Walo refusescha plinavant las pretensiuns dals adversaris che pretendan ch'i saja uschia ni uschia stà planisà da metter giu Beznau ed el veglia be anc profitar da l'iniziativa. Walo di ch'els sajan adina ì da quai ora che Beznau restia en funcziun enfin passa il 2020 sch'i grategia da survegnir ils documents da segirezza nezzessaris. L'Axpo haja gia investì tschients milliuns per quai.

RR novitads 08:00

Artitgels legids il pli savens