Siglir tar il cuntegn
Inhalt

Svizra Avunda suttascripziuns «Per vegnir ord las stretgas»

Il comité “Per vegnir ord las stretgas” ha ramassà durant pacs mais las 100’000 suttascripziuns necessarias per lur iniziativa. La finamira da quella è d’annullar l’iniziativa d’immigraziun da massa.

Ils iniziants han ramassà avunda suttascripziuns per l'iniziativa.
Legenda: Ils iniziants han ramassà avunda suttascripziuns per l'iniziativa. Keystone

L’iniziativa d’immigraziun da massa era vegnida acceptada cun ina pitschna maioritad da 50,3%. Ils iniziants da l’iniziativa èn tenor lur communicaziun segirs, ch’ina maioritad da la populaziun Svizra è però era per la via bilaterala cun l’UE. E perquai che la contingentaziun da l’immigraziun n’è betg cumpatibla cun la via liberala, dess il pievel anc ina giada pudair vuschar davart questa fatschenta.

Iniziativa n'è anc betg inoltrada

L’iniziativa n’è betg anc inoltrada ed il comité fiss pront da retrair l’iniziativa sch’il Cussegl federal chatta ina soluziun da realisar l’inziativa d’immigraziun senza periclitar ils contracts bilaterals. «Precis quest è la schanza da l’iniziativa», di Silva Semadeni, cussegliera naziunala dal PS sin dumonda dal RTR, «Ella è in bun med per far squitsch politic sin il Cussegl federal da chattar ina buna soluziun senza periclitar la via bilaterala.»

La Svizra sto cuntinuar las tractativas cun l'Uniun europeica cun presvasiun.
Autur: Martin CandinasCusseglier naziunal PCD

Che l’iniziativa flaivlentia la posiziun da la Svizra en las negoziaziuns cun l’UE, na craja Martin Candinas, cusseglier naziunal dal PCD betg. «Era l’UE sa, che 100’000 suttascripziuns vegnan ensemen svelt suenter ina votaziun cun resultat fitg stetg e perquai è la situaziun clera - la Svizra sto cuntinuar las tractativas cun l’UE cun persvasiun e metter enturn la voluntad dal pievel.»