Siglir tar il cuntegn

Header

Navigaziun

Pèr pli vegn che sesa sin in baun.
Legenda: Suenter il na a l’inziativa «AVSplus» vegn l’augment da la renta d’AVS da 70 francs mess en dumonda. Keystone
cuntegn

Svizra AVS: Dispita davart 70 francs dapli il mais

Cun la refurma da l’AVS 2020 duai la tariffa da conversiun vegnir sminuida. Cunquai dessi damain daners or da la cassa da pensiun. Per cumpensar quai vul il Cussegl dals chantuns augmentar la renta d’AVS per radund 70 francs il mais.

Suenter il na dal pievel a l’iniziativa « AVSplus » vegn quest augment però mess en dumonda.

Il Cussegl dals chantuns era sa cunvegnì l’onn passà ad in cumpromiss: Per mais duai dar 70 francs dapli renta d’AVS per uschia cumpensar la tariffa da conversiun tar la cassa da pensiun. Avant in mais ha la cumissiun responsabla dal Cussegl naziunal però tratg en la struva e puspè stritgà quels 70 francs.

E suenter il resultat da votaziun da la fin d’emna di la presidenta da la PPS Petra Gössi, ch’in augment da la renta d’AVS na saja per il mument betg pussaivel. Il na a l’iniziativa «AVSplus» haja mussà cleramain ch’il pievel na veglia nagin augment dal nivel da rentas. Er il president da la PPS Albert Rösti è s’exprimì cunter l’augment. Ins haja pli augment ina ferma AVS che saja da finanziar a lunga vista ch’in augment che na saja la finala betg da finanziar.

Sco alternativa tar ils 70 francs dapli fan la PLD e la PPS ussa novas propostas tar la refurma 2020.