Siglir tar il cuntegn
cuntegn

Svizra Avertura dal tunnel da basa: enorma lavur per la segirezza

En in mais vegn inaugurà il tunnel da basa dal Gottard. I vegn spetgà passa 1’000 giasts, tranter auter l’entir Cussegl federal, ministers da traffic da l’exteriur e testas da regenzas. Las mesiras da segirezza èn enormas, cunzunt suenter ils attentats da Brüssel e Paris. Involvids èn dus chantuns.

Sulet per la segirezza dal tunnel da 57 kilometers è la lavur immensa.
Legenda: Sulet per la segirezza dal tunnel da 57 kilometers è la lavur immensa. Keystone

Il prim da zercladur vegn ad esser preschenta tanta prominenza politica sco strusch insacura. Dus chantuns èn pertutgads, i dat plirs organisaturs: L’Uffizi federal da traffic, l’AlpTransit e las Viafiers federalas. Suenter las attatgas terroristica avant curt temps datti anc ina giada pli autas pretensiuns da segirezza.

Per l'avertura dal tunnel da basa dal Gottard ha in stab spezial per las mesiras da segirezza il commando per dus chantuns. Las regenzas da l'Uri e dal Tessin avevan suttascrit ina cunvegna en quest senn.

Uri e Tessin surdattan il commando

Auter che al Forum mundial d’economia WEF a Tavau na cumonda al Gottard betg ina polizia chantunala. Enstagl è in stab spezial responsabel per dus chantuns – Uri e Tessin.

Sco il maina-acziun general Lorenzo Hutter ha ditg envers SRF, saja quai l’emprima giada che duas regenzas dettian il commando a be in stab che possia agir per dus differents chantuns. Quants funcziunaris che vegnan ad esser en acziun tar l'avertura dal tunnel n'ha el dentant betg tradì. La lavur per segirar il tunnel da 57 km cun ils blers corridors laterals saja dentant enorma.

RR novitads 09:00