Cunquai ch'il dumber d'infecziuns novas e mortoris pervi da Covid-19 sa reducescha vinavant, ha il Cussegl federal decis da dar gas cun schluccar las restricziuns per la Svizra.
15 da zercladur 2020
La Svizra avra ils cunfins per ils pajais da la EFTA ed UE sco er per la Gronda Britannia e betg be per la Germania, Austria e Frantscha. Il Cussegl federal ha cunquai decis dad avrir pli spert tut ils cunfins - oriundamain era previs be dad avrir ils cunfins cun la Germania, l'Austria e la Frantscha.
Cas spezial: L'Italia ha gia desistì da controllas als cunfins a partir dals 3 da zercladur e l'Austria dapi ils 4 da zercladur. En omadus cas insista il Cussegl federal dentant sin sia decisiun d'avrir ils cunfins da la vart svizra pir ils 15 da zercladur.
19 da zercladur 2020
Pli paucas cumpetenzas per il Cussegl federal: Tenor lescha d'epidemia vala puspè la «situaziun speziala». Tenor quella dastga il Cussegl federal vinavant decider sez tschertas mesiras – el sto dentant consultar ils chantuns ordavant. Dapi ils 16 da mars ha il Cussegl federal regì cun dretg d'urgenza ed è sa basà sin la «situaziun extraordinaria» – senza ch'il chantuns hajan pled en chapitel.
Vinavant scumandà
Occurrenzas grondas cun passa 300 persunas restan scumandadas ad interim. Quai vala era per concurrenzas da sports cun contact corporal sco per exempel la lutga.