Il Cussegl federal vul extender la rait da vias naziunalas fin il 2030. Cunzunt en las aglomeraziuns duain las autostradas vegnir construidas per dapli autos. Per quest intent vul il cussegl federal impunder prest 13,5 milliardas francs. En tut sustegn il cussegl federal 32 aglomeraziuns.
En il center stettian l'uschenumnà bypass Luzern , il schlargiament dal sectur Rotsee-Buchrain (LU), sco er l'eliminaziun da la stretga enturn Crissier (VD) ed il sviament da Le Locle (NE). Quels projects sajan avanzads en la planisaziun uschè enavant, ch'ins possia uss dar liber ils daners per la realisaziun, ha ditg la cussegliera federala Doris Leuthard la mesemna a Berna a las medias.
Pretsch da benzin vegn auzà pli tard
La basa da finanziaziun è il fond da vias naziunalas e traffic d'agglomeraziuns ch'il pievel ha approvà avant in onn. Quel prevesa era d'augmentar il pretsch da carburant. Quest augment vegn ussa pli tard. Novas calculaziuns han demussà ch'ils meds supplementars vegnan duvrads pir a partir dal 2024, ha declerà Leuthard. Oriundamain era l'auzament dal pretsch da benzin stà planisà per il 2019 u 2020.
RR novitads 12:00