Siglir tar il cuntegn

Svizra Autos occasiun manipulads n’èn betg pertutgads dal scumond

L’Uffizi federal per vias Astra ha precisà il scumond d’immatriculaziun per autos cun software da svapur manipuladas: Occasiuns na sajan betg pertutgadas. Tgi che possedia gia in tal auto, dastgia vinavant charrar cun quel, uschia in pledader da l’uffizi federal envers SRF.

Autos da la marca Audi sin in parcadi.
Legenda: Autos cun ina software da svapur manipulada dastgan er vinavant vegnir vendids sco occasiun. Reuters

Tals autos dastgian er vinavant vegnir vendids sco occasiun. Tenor il pledader stoppia però adina esser pussaivel da localisar quels, cunquai che tut ils autos pertutgads stoppian vegnir remplazzads cun ina nova software. L’Astra preparia entant prescripziuns per che betg anc dapli autos manipulads vegnian immatriculads.

Amag fraina vendita d’autos manipulads

L'importader da VW Amag na venda il mument betg pli autos novs cun motors da diesel ch'èn pertutgads da las manipulaziuns da svapur. Tenor il concern svizzer èn pertutgads sulet in pèr tschients autos en Svizra.

Il dumber dals autos gia vendids saja però pli grond. Qua sa tractia da passa 128'000 vehichels. Vitiers vegnian anc in pèr milli autos che commerziants d'occasiun u importaders privats hajan vendì. L'Amag vul reparar ils autos pertutgads a partir da l'october.

RR novitads 06:00