- L'AutoDaPosta SA sto pajar enavos al chantun Grischun tranter 1,5 e 2 milliuns francs.
- La societad affiliada da La Posta, l'AutoDaPosta SA ha zuppà dal 2007 fin 2015 gudogns en la contabilitad.
- L'interpresa da transport ha pervi da quai retratg sur onns memia bia subvenziuns.
- Las subvenziuns per las lingias d'AutoDaPosta pajan ils chantuns e la Confederaziun. Els pretendan uss 78,3 milliuns enavos.
- L'AutoDaPosta SA vegn a pajar e tira consequenzas persunalas.
L’AutoDaPosta SA sto pajar al chantun Grischun tranter 1.5 e 2 milliuns francs pervia da las subvenziuns nungiustifitgadas dals davos onns, sco il minister da traffic grischun Mario Cavigelli ha confermà vers RTR. El saja stà fitg surstà che l'Uffizi federal da traffic n'haja betg remartgà pli baud las cudeschaziuns nunlubidas.
Zuppà gudogns per retrair dapli subvenziuns
L'Uffizi federal da traffic ha constatà che la AutoDaPosta SA ha fatg gudogn en il traffic regiunal subvenziunà. Uss sto l'interpresa da transport pajar enavos subvenziuns. Ils chantuns e la Confederaziun pretendan en tut 78,3 milliuns francs da La Posta.
Tranter il 2007 e 2015 aveva l'interpresa cudeschà enturn ils retgavs sin prestaziuns e custs variabels interns ed uschia zuppà il gudogn. Quai ha l'Uffizi federal da traffic constatà en il rom d'ina revisiun. Pervia da quai haja la AutoDaPosta SA survegnì pajaments d'indemnisaziun memia auts. Quai communitgescha l'uffizi da traffic.
Nagin gudogn cun subvenziuns
Per ils onns 2016 fin 2018 valia probablamain il medem. La AutoDaPosta SA applitgescha dapi il 2016 ina nova regulara da la contabilitad. Tenor la lescha da subvenziuns na dastgan pretschs da tariffa betg cuntegnair supplements da gudogn ubain pussibilitar gudogns transitorics. Las dumondas avertas en quai connex stoppian tenor l'uffizi da traffic anc vegnir scleridas.
Er anc vegnir scleridas ston las modalitads da pajar enavos las subvenziuns, sco er eventualas consequenzas penalas. La Confederaziun ed ils chantuns pajan mintg'onn 340 milliuns francs a la AutoDaPosta Svizra SA.
La Posta vegn a pajar
La Posta vegnia a pajar enavos cumplettamain las indemnisaziuns retschavidas illegalmain, pia 78,3 milliuns francs. Quai ha declerà la manadra dal concern La Posta, Susanne Ruoff.
Consequenzas persunalas
Ina controlla independenta haja confermà la scuverta la l'Uffizi federal da traffic, che la AutoDaPosta SA haja fatg gudogn en il sectur subvenziunà. Sin basa da las examinaziuns d'enfin uss, ha la direcziun da La Posta tratg consequenzas. La demissiun gia communitgada dal manader da la AutoDaPosta SA è per exempel vegnida realisada anticipadamain sin ils 5 da favrer 2018, e betg sco planisà sin la fin d'avrigl. Ad interim surpiglia davent dad immediat Thomas Baur la direcziun dad AutoDaPosta. Er il schef da finanzas dad AutoDaPosta sto bandunar ses post per immediat.
Ord l'archiv
RR novitads 10:00