Siglir tar il cuntegn
cuntegn

Svizra Augmentar l'attractivitad dal lain svizzer

Svizras e Svizzers duain sa decider pli savens per lain svizzer, cura ch’i va per cumprar mobiglias e bajegiar u renovar bajetgs. #Woodvetia sa numna la campagna che las branschas da guaud e da lain han lantschà ensemen cun l’Uffizi federal per l’ambient.

Pliras figuras da lain en in atelier
Legenda: La figura da lain da Madame Tussaud, oriunda da Berna, è pronta en l’atelier. MAD

Il guaud svizzer saja impurtant per proteger da privels da natira, per sa recrear e sco furnitur da lain. La realitad saja dentant ch’adina dapli laina vegnia importada per l’elavuraziun, scriva l’acziun per dapli laina svizra #Woodvetia. Cunzunt il ferm franc svizzer maina a questa situaziun.

Actualmain vegn pinà mintg’onn radund 5 milliuns meters cubic laina en ils guauds svizzers. Senza surduvrar ils guauds fissi dentant pussaivel da racoltar supplementarmain var in terz dapli, scriva l’acziun per dapli laina svizra.

En il center da la campagna #Woodvetia stattan figuras da persunalitads svizras en grondezza natirala. Quellas vegnan fatgas ord ina sort da lain che deriva da la regiun da la persuna. Durant l’entir onn cumparan adina puspè novas figuras da lain en lieus publics en l’entira Svizra. La fin da l’onn sa scuntran tut las figuras lura a Berna.

RR actualitad 17:00