Siglir tar il cuntegn
cuntegn

Svizra Aua svizra è da buna qualitad

La qualitad da l’aua da baiver e da far bogn en Svizra è buna e las resursas d’aua èn suffizientas. Quai è il resultat d’in rapport da la Confederaziun, cun il qual ella infurmescha mintga trais onns davart projects d’aua e d’auas persas.

2% da la precipitaziun cuvran il cumplet basegn d’aua da baiver, da diever e da stizzar fieu.
Legenda: 2% da la precipitaziun cuvran il cumplet basegn svizzer d’aua da baiver, da diever e da stizzar fieu. Keystone

L’aua da baiver e da far bogn svizra è tant microbiologicamain sco chemicamain «buna». Quai resulta dal rapport da la Confederaziun per la realisaziun dal protocol «aua e sanadad» da la WHO. Entras il protocol è la Svizra obligada d’infurmar la publicitad mintga trais onns davart projects en ils secturs d’aua e d’auas persas.

Buna qualitad, memia paucas datas

Il rapport concluda ch’i dat en Svizra darar malsognas infectusas tras l’aua. A medem temp ha l’entira populaziun access ad schubr’aua da baiver.

In dischavantatg numna il rapport però: la situaziun actuala da datas. En Svizra na dettia quai fin uss anc nagina survista centrala sur da la qualitad da l’aua da baiver. Il rapport basescha sin las datas da radund 10 chantuns e radund 1'400 provediders d’aua.

Il protocol da la WHO saja in instrument impurtant per reducir malsognas chaschunadas tras l’aua, scriva l’Uffizi federal per la segirezza da victualias. Dasper la qualitad da l’aua da baiver vegnan er examinadas malsognas chaschunadas tars l’aua, la dismessa d’aua spers e la qualitad generala da l’aua.

RR novitads 14:00

Aua svizra en cifras

  • ~ 1‘500 lais, blers auals e flums
  • ~ 2‘500 provediders d’aua
  • ~ 750 sereneras
  • ~ 3‘500 sereneras pitschnas
  • ~ 90‘000 km canalisaziuns