Siglir tar il cuntegn

Svizra Attest da vaccinaziun electronic adina pli derasà

A media vista duai l'attest electronic remplazzar il carnet da vaccinaziuns.

Squitta da vaccinaziun cunter la grippa.
Legenda: L'attest da vaccinaziun electronic duai gidar da decider tge vaccinaziuns che fissan anc da far. Keystone

Il dumber da dossiers sin la pagina d'internet meineimpfungen.ch saja s'augmentà entaifer in onn per 20% sin ussa 150'000, scriva l'Uffizi federal da sanadad publica (BAG). L'attest da vaccinaziun electronic simplifitgeschia la lavur dal persunal da sanadad. Il program possia analisar las vaccinaziuns ch'in pazient ha gia survegnì e cussegliar tge vaccinaziuns che fissan anc da far. Tut sa basa sin las recumandaziuns dal plan da vaccinaziun svizzer, scriva il BAG.

Tut en in lieu

Avantatgs haja la plattafurma era per las pazientas ed ils pazients. Tut las infurmaziuns sajan nudadas en in lieu central ed uschia na giajan quellas era betg a perder. Ultra da quai possian persunas dal fatg consultar las infurmaziuns en cas urgents, per exempel sin in viadi en pajais tropics.

Tenor l'Uffizi federal da sanadad publica duai l'attest da vaccinaziun electronic remplazzar a media vista il carnet da vaccinaziuns. Per cuntanscher quella finamira sustegna il BAG a chaschun da l’emna europeica da vaccinaziun ina campagna d’infurmaziun en las praticas da medis.

RR actualitad 12:00