Siglir tar il cuntegn

Svizra Attatga mortala cun cuntè en l'Argovia - Iranais ha confessà tut

En in alloschi sutterran per requirents d’asil datiers da l’ospital chantunal ad Aarau è mort in requirent iranais da 43 onns suenter ina cuntellada. El è mort en l’ospital. In ulteriur è vegnì blessà grevamain. Uss ha il cumpatriot iranais da 27 onns confessà tut.

La polizia era sa messa en acziun en las stanzas sutteranas a las 06:45 cun pliras patruglias pervi d’ina charplina, sco ella ha communitgà vers mezdi. Ils policists hajan lura chattà ils dus umens grev blessads.

Curt temp suenter hajan las forzas d’acziun chattà in um cun in cuntè plain sang. Il delinquent supponì n’haja fatg nagina resistenza a l’arrest.

Ils dus blessads èn vegnids tgirads en ambulanzas, las qualas han lura transporta els en l’ospital chantunal da l’Argovia. Curt suenter l’arrivada è l’um da 43 onns mort en consequenza da las grevas blessuras. La segund’unfrenda è vegnida operada urgentamain. L'um da 25 onns sa chattava dumengia vers mezdi anc adina en l'ospital cun grevas blessuras. Tenor indicaziund da la polizia è el dentant or da privel da vita.

Attatgader da l'Iran

L’attatgader è tenor indicaziuns da la polizia medemamain da l’Iran ed ha 27 onns. El ha confessà tut. Tar l'attatga è el vegnì blessà levamain e tgirà ambulantamain en l’ospital. Tuttas trais persunas sa chattavan ad Aarau sco requirents d’asil.

Ils motivs exacts e las circumstanzas dal mazzament n’eran anc adina betg clers la dumengia vers mezdi. La polizia da l’Argovia ha cumenzà cun investigaziuns intensivas. La procura publica Lenzburg-Aarau ha introducì in’inquisiziun penala.

RR novitads 14:00+