Siglir tar il cuntegn
Inhalt

Svizra Attatga en in tren a Salez – Duas persunas moran en l'ospital

Tant l'attentader sco er ina dunna da 34 onns moran pervi da lur grevas blessuras en l'ospital. Quai ha communitgà la polizia. Er il di suenter n’è il motiv per l'attatga en il tren insumma betg clar. L’act violent en il tren regiunal è vegnì registrà dad ina camera.

Quai ch'è enconuschent:

Charta cun il lieu Salez
Legenda: L'attatga è succedida a Salez en la Val dal Rain songagliaisa. SRF

En il tren regiunal tranter Buchs e Sennwald la sonda suentermezdi suenter las 14:15 ha in um svizzer (27) dà fieu ina dunna cun liquid inflammabel. La dunna è morta la dumengia a bunura. Curt suenter er l'attentader sez. Quai ha communitgà la Polizia chantunala da Son Gagl. Era auters passagiers han survegnì arsas dal fieu. Pliras unfrendas èn en clinicas spezialas per arsas, uschia la polizia dal chantun Son Gagl.

  • Duas persunas èn mortas. La dunna attatgada da 34 onns ed il attatgader sez.
  • L'um era armà cun in cunté. Cun quel ha el dà cuntelladas a passaschiers en il tren.
  • Ina da las sis unfrendas, la dunna da 34 onns, mora dumengia avantmezdi da sias feridas. Quai comunitgescha la polizia. Las autras unfrendas èn in uffant da sis onns, duas dunnas en las vegliadetgnas da 17 e 43 e dus umens da 17 respectivamain 50 onns. Ina da las duas dunnas è en stadi critic ed era l'uffant da sis onns è ferì grevamain. Ina persuna n'è betg pli en ospital.
In tren en la staziun.
Legenda: Il tren a la staziun da Salez. SRF, Beat Kälin
  • Suenter l'alarm da fieu en il tren ha il locomotivist fermà en la staziun da Salez-Sennwald. In um ch'era sin il trottoir è vegnì a gidar ed ha stratg l'attatgader che era sezz en flommas or dal tren.
  • L'attatgader è mort in dumengia en l'ospital en consequenza da sias grevas blessuras - arsas e tagls. El è stà in um da 27 onns dad in chantun vischin. El n'è betg stà prechastià.
  • Ina camera da video ha filmà l'attatga – co ch'il pledadader da la polizia, Hanspeter Krüsi raquinta.

Betg enconuschent:

  • Il motiv per l'attatga n'è betg enconuschent. Actualmain na dettia tenor la polizia nagins indizis per ina motivaziun politica u terroristica. Sin basa dal video suppona la polizia che l'um haja agì sulet.
  • N'er differentas perquisiziuns da chasas hajan manà ad indizis davart in motiv pussaivel. Dapli resultads da questa perquisiziun na dat la polizia betg enconuschent.
  • Sch'igl dat ina relaziun tranter l'attagader e sias unfrendas e scha schi, tgenina, na communitgescha la polizia betg.

RR novitads 20:00/22:00 ++