La Cunvegna da Paris davart il clima less cunfinar il stgaudament da clima sin maximal dus grads en cumparegliaziun cun il temp preindustrial. Per cuntanscher quella finamira èn s'obligads ils stadis commembers – pia er la Svizra – dad investir er lur finanzas en favur dal clima.
Ils blers investiders rinforzian dentant tras lur investiziuns plitost in stgaudament dal clima da quatter fin sis grads. Quai tenor ina examinaziun voluntaria da l'institut «Think Tank 2°Investing Initiative» che l’Uffizi federal d’ambient (UFAM) ha publitgà.
Grondas differenzas tranter ils 79 instituts participants
Betg tut ils 79 instituts investeschan tuttina en il clima. Intgins investeschan gia tenor la finamira da la Cunvegna da Paris, auters dentant anc insumma betg. Cunzunt pertutgond las investiziuns en il svilup d’energias regenerablas han las assicuranzas e cassas da pensiun svizras retard sin la fiera mundiala.
Tar l'enquista èn vegnids analisads ils quatter secturs promoziun d’energia fossila, producziun d’electricitad, transport ed industria.
RR novitads 12:00