Siglir tar il cuntegn

Svizra Assicuranzas: Damain gudogn per Zurich, dapli per Swiss Life

Ils dus concerns d'assicuranzas svizzers han preschentà lur cifras per l'emprima mesadad da quest onn.

Cumpareglià cun l'emprim mez onn da l'onn pass saja il gudogn net sa reducì per 22% sin radund 1,6 milliardas dollars. La svieuta saja dentant s’augmentada per 7% sin 18,5 milliardas dollars. Quai ha communitgà il concern d'assicuranzas Zurich Insurance. Las raschuns principalas per quest svilup sajan, gudogns da chapital pli bass, custs da restructuraziun ed ina tariffa da taglia pli auta.

Dapli gudogn per Swiss Life

L'assicuranza da vita Swiss Life ha l'emprim mez onn 2016 gudagnà dapli che la medem perioda da l'onn passà. Sco quai che la pli grond’assicuranza da vita svizra scriva en ina communicaziun, muntia il gudogn net a 500 milliuns francs. Quai è in plus da 1,4%.

Cun las premias ha Swiss Life incassà radund 10 milliardas francs. Quai èn 8% pli pauc che l'emprim mez onn da l'onn passà. Entant è la svieuta da l’administraziun da facultad creschida per 6% sin 656 milliuns francs. Las prognosas per l’entir 2016 èn tenor il management da Swiss Life er positivas.

RR novitads 08:00