Siglir tar il cuntegn

Header

cuntegn

Svizra Armada svizra vul cumprar material per 1,34 milliardas francs

L'armada svizra duai survegnir 18,8 milliardas francs ils proxims quatter onns. Per l'armament 2016 dumonda il Cussegl federal 1,34 milliardas francs. La glista da giavisch cuntegna tranter auter murters, camiuns e bartgas da patruglia, ma er material da reserva per ils aviuns da cumbat F/A-18.

L'armada vul cumprar material d'armament per 1,34 milliardas francs. Il Cussegl federal ha deliberà il program d'armament 2016.

audio
Saira: Program d'armament 2016
ord Actualitad dals 25.02.2016.
laschar ir. Durada: 2 minutas 28 Secundas.

Il pli grond post aveva il cussegl gia dà enconuschent pli baud: El vul cumprar in sistem da murters per 404 milliuns francs. Dasper il nov sistem da murters vul il Cussegl federal impunder 314 milliuns francs per camiuns e chars annex. 256 milliuns francs duain vegnir investids en armas polivalentas ch’ins porta sin la spatla.

Bartgas ed immobiglias

Il program d’armament prevesa era la cumpra da 14 novas bartgas da patruglia per 48 milliuns francs. Questas novas bartgas duain remplazzar bartgas che dateschan dal 1982.

In ulteriur post d’investiziun èn las immobiglias. Il Departament da defensiun ha dumandà il parlament per in credit da totalmain 572 milliuns francs. Quest credit cumpiglia er ils custs da 150 milliuns francs per in nov center electronic da calculaziun a Frauenfeld. Per la sanaziun cumplaina e la construcziun nova da la plazza d’armas Frauenfeld ha il Cussegl federal planisà 121 milliuns francs – quai en in’emprim’etappa.

In aviun da cumbat dal tip F/A-18 da l'Armada svizra.
Legenda: In aviun da cumbat dal tip F/A-18 da l'Armada svizra. SRF/Keystone

Material da reserva per aviuns F/A-18

Plinavant ha il Cussegl federal fatg la dumonda per la cumpra da material da reserva per ils aviuns da cumbat F/A-18. Per quai intent èn previs 127 milliuns francs.

Questas investiziuns sajan ina consequenza dal na per la cumpra da l’aviun da cumbat Gripen, argumentescha il Departament federal da defensiun. Perquai ch’i na dettia nagins aviuns novs, vegnian ils F/A-18 duvrads pli fitg che fin qua. Ord quai motiv dovria quai material da reserva.

RR novitads 16:00

Artitgels legids il pli savens