Cun il program d’armament 2015 ha l’armada cumprà sis dronas d'exploraziun per 250 milliuns francs. Adattaziuns a giavischs individuals da l'Armada svizra e problems nunspetgads han repetidamain chaschunà retards.
La Svizra ha dapi il 2019 naginas dronas d'exploraziun pli. Las veglias han ins zavrà ora suenter 20 onns. Quai ha surtut consequenzas per la controlla al cunfin. Ins stoppia perquai duvrar helicopters – che na sajan dentant betg adattads uschè bain da survegliar sco las dronas.
Entant quinta l'Uffizi federal da l'armament Armasuisse ch'i cuzzia dus ulteriurs onns fin che las sis dronas empustadas pon vegnir en acziun. Sco termin per finir il project prevesa l'uffizi federal uss sin la fin da l'onn 2024. Lura vegnia il sistem ad esser cumplettamain en acziun, di il pledader d’Armasuisse Kaj-Gunnar Sievert.