Siglir tar il cuntegn

Header

cuntegn

Svizra Antibiotica: En pitschens pass cunter bacterias resistenzas

En Svizra moran mintg'onn millis da persunas perquai ch'i manca antibiotica effizienta. In onn suenter che la Confederaziun ha lantschà ina strategia naziunala sa mussan però emprims success en il cumbat cunter bacterias resistentas.

«Nus na pudain betg franar il svilup, sin il pli retardar el», ha ditg Hansjakob Furrer, schefmedi da la Clinica per infecziologia da l’Universitad da Berna. La raschun è che mintga diever d’antibiotica auza il privel da resistenzas.

Duvrar antibiotica mo tenor basegn

Ina pussaivladad èsi perquai da duvrar antibiotica mo cura ch’i fa propi basegn. Tant ospitals ed er medis da chasa duai vegnir sensibilisads da dar antibiotica a lur pazients.

Malgrà questas stentas crescha il diever d’antibiotica vinavant en la medischin’umana. En ospitals acuts en Svizra è il dumber da dosas quotidianas creschì per 36% tranter il 2004 ed il 2015. Ina raschun per quest svilup è tenor Furrer che la populaziun crescha e vegn adina pli veglia. In’autra è ch’il temp da tractament vegn pli lung perquai ch’i dat adina dapli resistenzas.

Er tar la medischina d'animals ston ils veterinaris reducir il diever d'antibiotica.
Legenda: Er tar la medischina d'animals ston ils veterinaris reducir il diever d'antibiotica. Keystone

Prevenziun per evitar infecziuns

Fin ussa hajan ins prendì a mauns dus terzs da las mesiras decidias. Tranter quellas tutgian er mesiras da prevenziun, uschia ch'i na dat gnanc infecziuns, scrivan ils uffizis federals responsabels.

In labor naziunal duai identifitgar e survegliar furmas da resistenza. Plinavant lavuran experts vid criteris, co e cura ch'igl è da prescriver antibiotica.

RR novitads 14:00

Artitgels legids il pli savens