Siglir tar il cuntegn

Header

cuntegn

Svizra AMAG curregia las manipulaziuns da VW

L'importader svizzer da VW, AMAG, ha cumenzà a meglierar ils motors da diesel ch'eran equipads cun software manipulada. Tenor atgnas indicaziuns hajan ins cumenzà cun il model Amarok.

La AMAG quinta ch'i duria l'entir onn enfin che tut ils models da VW sajan curregids. Suenter ch'ils motors da diesel dal model Amarok sajan curregids vegnia il Passat vidlonder. Ils clients pertutgads survegnian proximamain posta en quest connex. Els stoppian lura fixar in termin cun ina garascha associada a la AMAG.

Per part tanscha in Update da la Software

Tar ils motors da 2 liters e 1,2 liters tanschia in Update da la Software, scriva l'AMAG. Quai duria radund ina mes'ura. Als motors da 1,6 liters stoppian ils mecanists dentant montar in toc supplementar. Quai duria radund trais quarts d'ura. Las correcturas na vegnian betg ad avair influenza sin la prestaziun dal motor ed er betg sin las svapurs da CO2.

L'Uffizi federal da vias quinta ch'i dettia en Svizra radund 180'000 autos da VW cun motors manipulads. Il concern d'autos tudestg VW surpiglia ils custs per las correcturas.

RR novitads 6:00

Artitgels legids il pli savens