Alpiq tegn ovras electricas

Il concern Alpiq dat si ils plans da vender ina cumpart da sias ovras electricas. Plinavant ha Alpiq fatg l'emprim mez onn ina perdita da 109 milliuns francs.

Il logo oransch da Alpiq sin ina chasa.

Legenda da maletgs: Alpiq na venda tuttina betg ovras electricas. Keystone

Il concern d'energia Alpiq na venda tuttina betg ina cumpart da sias ovras idraulicas. Quai ha communitgà il concern svizzer. La raschun principala saja stada ch’investiders potenzials na sajan betg stads pronts da pajar avunda en vista als bass pretschs d'electricitad e las malsegirtads regulatoricas. Il mars da quest onn aveva l’interpresa Alpiq communitgà da vulair vender ina cumpart da ses portfolio d'ovras idraulicas.

Ultra da quai ha Alpiq communitgà las cifras da l'emprima mesadad da l'onn: Il concern ha fatg ina perdita da 109 milliuns francs. L’onn passà eran quai anc dus milliuns francs. Tranter auter è il svilup dal curs da l’Euro responsabel per quai resultat. Plinavant ha era la fermada ord program da l’ovra atomara da Leibstadt influenzà quai resultat.

RR novitads 08:00