Sco la PBD Svizra ha communitgà è la decisiun crudada cun sulettamain ina abstenziun da la vusch. La basa per questa decisiun era gia vegnida messa il settember. Quella giada avevan ils delegads adattà las statutas en vista a la fusiun. Er en il Cussegl naziunal politiseschan il trais cussegliers naziunals da la PBD gia dapi in onn ensemen cun la PCD e la Partida evangelica da la Svizra en la fracziun dal center.
Avant che la nova partida «Allianza dal center» po dentant vegnir realisada, ston er ils delegads e las delegadas da la PCD approvar la fusiun. Quels decidan ils 28 da november. Sche era la PCD di Gea, lura pudess la partida fusiunada cumenzar il prim da schaner 2021, scriva la PBD.
Fusiun en il Grischun anc da discutar
Ina fusiun sin nivel naziunal na munta dentant betg automaticamain er ina fusiun da las partidas chantunalas. Sco il president da la PBD dal Grischun Beno Niggli di envers RTR, hajan las partidas chantunalas suenter ina fusiun naziunala peda 5 onns per er fusiunar ubain restar en las structuras actualas. Per il mument sajan ils burgaisdemocrats ed ils cristiandemocrats vid emprimas discussiuns. La PBD grischuna decida en il decurs da l'enviern schebain ella vul er fusiunar sin livel chantunal.
Jau sun persvadì che la nova marca vegn en il dretg mument per porscher las dretgas respostas per las sfidas da noss pajais e per midar la relaziun da las forzas politicas.
