Las partidas giuvnas da l'Allianza dal Center, dals Verdliberals, da la Partida evangelica, da la Partida socialdemocratica e dals Verds vulan in barat cun il Cussegl federal, sco igl ha num en il scriver ch'è vegnì publitgà il glindesdi en la rait. Tranter auter na duajan giuvenils betg vegnir discriminads, sch'i dat schluccadas en connex cun ina vaccinaziun. E per giuvenils cun problems psichics dovria ina purschida d'agid suffizienta.
La giuventetgna dovra perspectivas
Las partidas giuvnas s'engaschan per quai, che l'instrucziun da preschientscha daventia puspè pussaivla per tuts. Ina strategia rigurusa da testar e concepts da protecziun duajan pussibilitar quai. Grazia a tests da corona e contact tracing, duaja dar ulteriuras schluccadas per giuvens e giuvnas, uschè svelt che quai è giustificabel nà da la situaziun epidemiologica.
«Nossa generaziun dovra urgentamain puspè perspectivas», hai num en la brev averta. Adina dapli giuvenils na sa sentian betg pli chapids. L'augment dal dumber da persunas giuvnas cun grevs problems psichics, fetschia gronds quitads.
Violenza n'è betg la soluziun
Raschun per las pretensiuns da las partidas giuvnas èn ils acts da violenza da giuvenils da venderdi saira a Son Gagl.
Las partidas giuvnas condemnan cleramain la violenza. Ellas scrivan dentant er, che las vuschs da tut quels giuvenils che sa tegnian dapi in onn vi da las reglas da corona, giajan a perder en tut ils rapports davart ils eveniments a Son Gagl.
Adattà al tema:
