Siglir tar il cuntegn

Svizra Albert Rösti: ina tscherna da cuntinuitad per la PPS

El vuleva daventar cusseglier guvernativ dal chantun da Berna e cusseglier dals chantuns. Quai n’ha betg funcziunà. E sia candidatura per il Cussegl federal ha el retratg ad ura. Questa giada però stuess tut funcziunar: Albert Rösti daventa president da la Partida populara svizra.

Ses messadi è cler: Mantegnir l’independenza da la Svizra, far ina politica d’immigraziun restrictiva e cumbatter la birocrazia. El saja apunta 100% PPS, di Albert Rösti da sasez. Il figl d’in pur da l’Oberland Bernais ha chattà ses dachasa politic dapli 18 onns en la Partida populara svizra.

La finamira: mantegnair la quota d'electurs

Sco manader dal cumbat electoral 2015 ha el gidà da cuntanschì in resultat da record per la PPS: 29,4% quota d’electurs. E questa quota vala quai uss da mantegnair sco president da partida.

Che quai è ina sfida, sa era Albert Rösti. Ma el saja ina persuna ch’utiliseschia schanzas – e da daventar president dal PPS è ina tala schanza. El vul manar enavant la partida sco enfin uss – «ina via da success n’esi betg da bandunar».

«Rösti n’è betg Brunner»

E tuttina manass el in auter tun a la testa da la partida. «Rösti n’è betg Brunner», di Rösti. Ma quai pertutga be il stil e la retorica – tar ils cuntegns e las finamiras da la partida na sa mida bler. Cun la tscherna dad Albert Rösti ha tscherni la PPS la via da cuntinuitad.