Sur tut en regiuns pli autas e dasper auas pli grondas n'èn las temperaturas la notg passada betg crudadas sut 20 grads. Uschia hai dà la notg passada en blers lieus ina notg da tropas. Tenor il servetsch da l'aura MeteoNews è quai stà tranter auter il cas a Lucerna, Vevey, Basilea e Vaduz.
Ina fin da l'unda da chalira n'è anc betg da vesair. Il rest da l'emna e la fin d'emna saja da quintar cun temperaturas sur 30 grads. La notg sin venderdi e sin sonda saja lura era da spetgar notgs da tropas en la Bassa.
Co sa cuntegnair tar chaliras
Sur tut per persunas da gruppas periclitadas po la chalira esser privlusa. Tar questas gruppas tutgan sur tut persunas pli veglias, persunas (cronicamain) malsaunas, dunnas en speranza ed era uffants pitschens. Quels dovran attenziun speciala e sche necessari agid.
Recumandà per sa proteger dal chaud è:
- d'evitar stentas corporalas durant il temp il pli chaud dal di,
- da tegnair corp ed abitaziun/chasa uschè frestg sco pussibel,
- da baiver bler'aua (almain 1,5 liters a di),
- da mangiar spisas fraidas e rinfrestgantas
- e da gulivar suenter activitads sportivas il sal en il corp.
Suandants sintoms pon sa mussar tar stress da chalira:
- temperatura auta dal corp
- puls pli aut
- flaivlezza/stancladad
- mal il chau
- gramfia da musculs
- bucca sitga
- confusiun, sturnizi
- malesser, render, diarrea/sfuira
- disturbis cun durmir
En cas da quests sintom: far star giu la persuna pertutgada, e sfardentar il corp. Sche la persuna è conscienta, dar aua frestga da baiver. Sche quai na porta nagin megliurament, clamar agid medicinal.
RR novitads 10:00