Siglir tar il cuntegn

Header

video
Alain Berset fa pled per Rumantsch
Or da RTR dals 06.12.2017.
laschar ir. Durada: 31 Secundas.
cuntegn

Svizra Alain Berset è il nov president da la Confederaziun

Alain Berset succeda a Doris Leuthard sco president da la Confederaziun. Elegì sco vicepresident è il cusseglier federal Ueli Maurer da la PPS.

L'Assamblea federala ha elegì Alain Berset cun 190 da 210 vuschs sco president da la Confederaziun per il proxim onn. Il Friburgais ha uschia obtegnì duas vuschs dapli che Doris Leuthard avant in onn. En ses pled d'engraziament ha Berset accentuà che la Svizra saja ina naziun multifara e ch'i saja impurtant da mantegnair la coesiun naziunala. Per quai saja impurtant da tadlar in sin l'auter.

audio
Mezdi: Alain Berset, il nov president da la Confederaziun
ord Actualitad dals 06.12.2017.
laschar ir. Durada: 4 minutas 42 Secundas.
Nossa stabilitad sociala ch'è er impurtanta per l'economia, pretenda che nus faschain attenziun co ch'i va cun ils pli flaivels.
Autur: Alain Berset President da la Confederaziun 2018

Sco vicepresident da la Confederaziun è vegnì elegì cun 178 da 192 vuschs il cusseglier federal Ueli Maurer da la PPS.

Tgi è Alain Berset?

Sco pli giuven cusseglier dals chantuns è Alain Berset vegnì cun 34 onns, il 2003 en il parlament a Berna. Suenter 9 onns sco cusseglier dals chantuns per il chantun Friburg è el vegni elegì il 2011 sco cusseglier federal. Dapli il schaner 2012 è Alain Berset minister da sanadad.

Animal politic pront per il dialog

Alain Berset saja quai ch'ins numna in «animal politic», in politicher cun corp ed olma, di il cusseglier dals chantuns da la PCD, Stefan Engler.

audio
Bunura: Co vesan ils parlamentaris grischuns Alain Berset?
ord Actualitad dals 06.12.2017.
laschar ir. Durada: 4 minutas 11 Secundas.

Stimà vegn Berset era da l'autra vart dal spectrum politic. Sco president da Santé Suisse haja Heinz Brand adina puspè da far cun il minister da sanadad. Natiralmain ch'el haja ina tut autra vista sin ils problems – per exempel gist en il sectur da sanadad. Berset na saja dentant betg in politicher che suondia cun egls serrads in'ideologia.

Ina passiun parta la la cussegliera naziunala Silva Semadeni cun ses cusseglier federal. Ella enconuscha Berset oravant tut en connex cun dumondas da linguas minoritaras. Cura ch'i va per cumbatter per las linguas naziunalas s’engaschan ils dus socialdemocrats fermamain. Silva Semadeni spera perquai che Alain Berset nizzegia ses onn presidial per rinforzar la coesiun da las differentas culturas svizras.

audio
Saira: Alain Berset – il nov president da la Confederaziun
ord Actualitad dals 06.12.2017.
laschar ir. Durada: 2 minutas 25 Secundas.

En ina sumeglianta direcziun van las aspectativas da Heinz Brand. Il nov president da la Confederaziun haja la chaschun d'avischinar la Svizra franzosa a la Svizra tudestga. Main grondas èn las speranzas da Stefan Engler per l’onn presidial da Berset. En noss sistem politic, nua ch'il president u la presidenta mida mintg'onn, sajan las pussaivladads da quest post limitadas.

L'onn presidial da Doris Leuthard

Doris Leuthard è anc enfin la fin da l’onn presidenta da la Confederaziun. Leuthard è per la segunda giada presidenta. Precis avant set onns, il 2010 aveva ella gia gì la carica sco presidenta da la Confederaziun. Dapi il 2010 è Doris Leuthard era la scheffa dal Departament federal per ambient, traffic, energia e communicaziun. Avant era ella responsabla per il Departament federal d'economia. Doris Leuthard è dapi il 2006 èn il Cussegl federal.

RR actualitad 11:00

Artitgels legids il pli savens